طيب! ليه رمضان أحلى في السودان؟ سؤال يستحق التفكير .. السودانيين في رمضان أنواع ! في نوع عااارف نفسو ما بقدر على الصيام عشان كدا بفطر يومي زي المافي رمضان !! و النوع دا جزاه الله خيراً و لا يكلف الله نفساً الى و سعها و الصراحة راحة ! في نوع تاني دا صيامو جوع و عطش ساي "دا رجيم يا قنيط" بيعمل اي حاجة لاكن ما بياكل و لا يشرب و المشكلة مقتنع في قرارة نفسه انو صايم .. يلا شفتو النوع دا حيكون عندو بيت ناصية دورين في الجحيم !! دا الله حيعزبوا ليك عزااب .. طيب ! في نوع تالت ديل البصومو و بيصلو و بدعو و تراويح و تهجد و دنيا و عالمين و ايمان و تقوى و هديل هههه المهم ديل رزقهم الله الفردوس بغير حساب و رزقنا معهم :) .. لاكن بالجد مهما كان صيامنا اسي ما بنقدر نحصّل صيام الصحابة ..! ديك الواحد بكون صايم و مارق غزوة مع جيش المسلمين و احنا الواحد ما بيقدر يقوم من السرير يوطّي المكيف !! الله المستعان بس :( .. رمضان احلى في السودان لانك لو طلعتا البلكونة قبل المغرب بي ٣ دقايق حتلقى بين كل فرشة و فرشة .. فرشة ! في كل حي في كل زقاق في كل شارع في كل مكان .. ناس طالعة تفطر برّة "شعب كريم و شهر عظيم" :)
و دائماً تبقى لمة الأهل و الأقارب و الأحباب لمسة من رحيق الجنّة .. الإفطار معهم له طعمه الخاص .. و "جَبَنة بعد المويات" ذلك النعيم يا صديقي لم يعلمه إلا اصحابه .. و بعد شرب الجبنة تبدأ الدردشات و التعرصات و البعض من المناخسات بين الشباب .. :D
اما السحور السوداني فهي قصّة .. ضاعت مفرداتها بين الرقاق بي اللبن و بين سلطانية الزبيب و الرز باللبن و الدخن و الحلبة و غيرها :)
دعك من السحور و لنتكلم عن الفطور .. مهما اختلفت الأطباق تبقى "اللقمة أو العصيدة" هي الأساس مع اختلاف الملاح اللذي يوكل معها "روب .. شرموط .. أم رقيقة .. الخ" :)
و المشروبات متعددة و متنوعة و لذيذة "كركدي .. ابري .. حلو مر .. ليمون .. الخ"
هذا ما وجدت في السودان .. قد يكون صحيحاً و قد يكون صحيحاً !! داير تقول غلط يا ود الحرام موش؟ ميتينك زاتو !!! :@ ههههه الى اللقاء .. و كل عام و انتم بخير :)
ليست هناك تعليقات:
إرسال تعليق